Lung Phun pakhat

He Lungphun hi South Sabual khaw hlui a awm a ni a, pasaltha lungphun a ni. He lungphuna a lan dan hi chuan he pasaltha hian sa engemaw zat a kap a, nula pawh 16 lai a ngai tih a lang. A thei piap piap khawp mai. Kan hmuh ang hian a lungphun chung lam hi a bal tawh avangin a inziak hi a hriat kim theih tawh loh a ni.

Hmanlai kan pi leh pute khan Pasaltha an ngaisang tih chu kan hria. Tin, an thih hnuah Pawla kawt chhuaha Pawla khan tlangval nula ngai lo chu a sairawkherhin a lo perh pawp ang a, a perhna hnuhma chu kum thum a ngawt dawn niin an ngai. Chuvangin tlangvalin nula ngai lo nih an duh lo.

'Di nei lo Pawla'n a sai an ti,
Fam mah ila min sai bil hlei lawng e,
Ka nemrang puan ka di zawnna.'

Amaherawhchu, nula ngai tih hian sawi dan a inang lova, hemi chungchang hi thui tak sawi tur a awm ang. Engpawh nise, chu ngaihdan (tlangval in nula ngaih ngei ngei an tumna) chuan thuk takin khawtlang nunah bu a khuar a, tlangval pawhin nula an lo ngai anih chuan an chapo pui hle tih he lungphun atang hian a hriat thei. South Sabual khua hi Mamit District huamchhunga awm a ni e. (Photo : malsawmliana)

MRSA in Lirnghing chungchang Zirna buatsaih

Ni 20.4.2010(Thawhlehni) zan khan Mizo Research Scholar Association(MRSA), Headquarters Shillong chuan Mizo te zinga Scientist kan neih zinga lar ber pawl leh Lirnghing chungchanga kan mithiam neih, Dr Lalliana Mualchin kawmna leh Lecture ngaihthlakna hun a buatsaih a.He hun hi Pu Malsawmliana'n a kaihhruai a, K. Vanlaldinpuia, General Secretary in Report tawi a pe bawk.

He hun hi Prof. R. Lalthantluanga, Pro-Vice Chancellor, NEHU leh Pi Lalsangluri Zadeng, Deputy Registrar, NEHu ten an hman pui bawk.

Dr Lalliana Mualchin, Seismic Consultant to the Govt. of Mizoram in 'Potentials and Implication of emerging earthquake in Mizoram’ tih thupui hmangin Lecture a pe a, a ngaihnawm hle.

Amah hi Chief Seismologist, California Department of Transportion, USA atanga kuma 2005 pension a ni a. Lirnghing chungchanga Mizoram dinhmun te a tarlang a, a bengvarthlak hle.

Dr.Lalliana Mualchin chuan Lirnghing laka inven a nih theih nan leh, lirnghing a thlen thulha chhiatna nasa zawk pumpelh nan Aizawl chu tihlen a, khawpui chu thawl zawka zar pharh a pawimawh thu a sawi. Aizawl khawpui kawng tawt lutuk siamrem te, insak dan mumal zawka siam, In leh In inkar zim lutuk tih zauh dan kawng zawn a that thu a sawi a, chu chu lirnghing laka invennan thil pawimawh tak a ni a ti. Mizoram hi India rama lirnghing thlen theihna hmun hlauhawm ber (Zone V) an tih zingah a tel a, ‘Magnitude 8 emaw a aia sang emawa a nghin theihna hmun a ni,’ tiin a sawi.

Lirnghing thlen duh dan leh a nasat dan tehna atangin India ram chu Zone 4-ah then a ni a. Zone II chu magnitude 4.9 aia sang nghing lohna tur hmun niin, Zone III chu magnitude 6.9 aia sanga a nghing lohna tur hmun a ni. Zone IV chu magnitude 7.9 vel thlenga a nghin theihna hmun a ni a, Zone V chu magniture 8 leh a aia sanga a nghing theihna hmun niin, Mizoram chu zone V-ah a awm.

Lirnghing chu leilung inpelhsawlh atang te leh thil chi hrang hrang atanga a insiam theih thu sawiin, ‘Lirnghing hi Mizorama a thleng thei reng a, a thlen hun tur erawh sawi theih a ni lo,’ tiin a sawi.

Lirnghing laka inven theihna atan Mizoram leilung chu nasa lehzuala zirchian a, lirnghing enna khawl engemawzat neih a tul thu a tarlang a. In zangkhai lam sak uar a, ban leh ban inkar kawkalh siam uar te leh In sak lai atanga uluk taka ruahmanna siam a pawimawh thu Dr.Lalliana Mualchin chuan a sawi bawk a ni.

Dr.Lalliana Mualchin chuan, Lirnghing thlen thulha chiai lutuk leh mangang lutuka mipui an awm loh nan training neih fo te, mipui zirtirna pek uar te, helicopter ruahman mai tur neih te, inbiakpawhna hmanraw rinawm chi neih te, kawng leh in chim thenfaina khawl tha neih te a pawimawh thu a sawi bawk a ni.

He huna hian NEHU-a Mizo Research scholar awm te bakah Post Graduate zirlai engemaw zat an kal bawk a, NEHU-a thawk Mizo engemaw zat an tel bawk. Zirlaiten lirnghing chungchang bakah a lehkha zir dan chungchangte zawhna engemaw zat an zawt bawk.

Thianpa chu le !!

Kum engmaw zat a liam hnuah thiante chu nupui fanau neiin an inkai diah diah tawh a. Keini tak ngial pawh faten nupui te pawnfen pawt chunga duhzawng lei ngena an nawrh hun lai kha kum tam a liam leh tawh a.Kum te pawh a lo tam ve tawh a niang rualpui ni a kan ngaihte pawhin min 'u' vek tawh bawk a, a thenin min 'pu' a, awmdan thiam a lo har dawn hle a nih hi.

Zan khat chu nupui fanau te nen hlim takin kan inkawm a, fate lah chuan 'a pa, a pa' min ti reng a, kan hlim khawp mai a. Chutih lai chuan thian pakhat hi a rawn leng a, 'khawnge a kal' tih ka han zawh chuan nula a rim thu min hrilh a. A hmel atang chuan a nula rim chungah a lungawi vak lo niin a hriat a, ka zawt lem hlei lova. Thiani'n thingpuite a han lum a, in pahin kan inkawm a. Ani hi ka thian bul tak, nupui ka neih hma pawh a ka kawm ber leh thu chhia tha ka hrilhna ber a ni a. Ani pawh hian kan in hi a rawn chuangkai chawt a, a lungawilohna leh a lawmna te hi a rawn sawi thin bawk a.Ka fate hi a rawn lawm a,zan rei tak tak thleng hian kan ti ti thin a. Mahse tunhnaiah hian hlimlohna ruk hi nei hian ka hre deuh tlat a, ani phei chuan a inhre chuang lova. Ka ngaidan mai mai nge ni, hetia Pathian malsawmna changa nupui fanaute kan han nei ve takah hian mal riau hian a inhria ni hian ka hre tlat a. Kan han sawichhuah nikhua hian 'nupui nei hun' tawh hi chuan a inhria a,amah chauh ni lo khawtlang pawhin nupui nei rual niin an hmu vek bawk a.

Eng vangin nge nupui duh viau tawh si, a neih mai loh ? Inchhungkhurah a la inpeih lo nge ? Ngaihzawng a nei lo nge ? A hmu zo lo nge ? A zei lo em ni ? Nupui neih a tum lo hrim hrim em ni zawk? a chhan chi hrang hrang ka ngaihtuah a. A eng ber hi a harsatna ni ang aw? ka ti thin. Kan thainte zingah hian nula lamah pawh khawtlangin pasal neih hun tawh ni a kan ngaih la nei lo hi engemaw zat an awm ve bawk a.

Tichuan a haw hnuah a hnuaia hla thu hi ama pual liau liau in kan remkhawm ta a ni.

Kha chen mahten i leng tawh a,
Tunah pawh a dang chuang lo;
Engtin awm dawn che ni maw?
Khua tlaiin i mawi mang e.

Mi hraiten siang an lawi,
Chunnu zuapa sirah beiin;
Muang ten zanmu an chhing,
Chun leh zua tihlimtu lo ni e.

I awt ve lawm ni,hraileng chawi
Dawn ve la, lungchim ten;
Engtikah hrai chawi ve che maw,
Khuarei nghahnan a sei lua e.

I chunnu chan dawn ve la,
Tu mawng beng hian a mawi dawn lo e;
He khawvel hring chan chhungin,
Tu biang chul lova a liam i phal em ni?

La nu hei zawng zingah,
Tum tawk leng an piang lawm ni?
Thaikawi biah nem hlan ka nuam e,
I tan theihtawp huamin.

I lenrual duhte thlir ve la,
Hraileng chawiin siang an lawi;
Tu dang an ngai lo, hmakhua thlirin,
Hlim ten nunkhua an hmang a sin !

Engtik nge mo ki kan phawi ang a,
Zawlpuan kan phah ve hun tur ?
Kawla ni chhuak kan chhiar i lenrualten,
Chhiar ve hian i mawi si lo.

Kum sul tam a vei, hai ang tarin,
Sakhmel pawh a zur zual zel si;
Hrai chawi lova i len hi,
A awl hian ka ring ngei e.

RAM LEH HNAM HMANGAIHNA HLA
- Malsawmliana

Tunlai thangtharte rilru a riak reng thin leh kan thupui ber lo ni ta ram leh hnam hmangaihna hian zofate min chiah hneh ta hle mai. Kan rama tlawmngai pawl lian ber leh huhang ngah ber ti a sawi ngam YMA te pawhin hma a han la chho bawk nen, tunah chuan mizo fate hi hnamah kan chiang ta hle in a hriat a, a lawmawm hle mai. Kan thupuiah hian ram leh hnam hmangaihna hla kan han ti tak na a, hemi hrulah hian hnam rilru(nationalism) putna kawnga hla hnathawh leh mi rilru a chawh thawh dan te han tar lang tel ila.

Kum zabi 18-na hma lamah kha chuan tunlai a hnam rilru leh hnam hmangaihna kan neih ang hi khawvel hnam hrangte zingah a awm meuh lo va. Hmanlai kan pi leh pute khawsak ang deuhvin mahni khua leh tuiah an tui zawk a, hnam pum rilru an pu meuh lo. Amaherawh chu, kum 1789 a French Revolution a lo chhuah atang khan hnam rilru(nationalism) hi a lo piang chho tan a, khawvel hmun tinah chi leh hnam intih bingna te, inlak hran duhna te a lo piang ta zel a. Hetianga hnam rilru a lo pian takah chuan mahni hnam/ram tana thahnemngaihna a lo awm a, chumi chuan khawvel ram hrang hrangte inkarah in ngeihlohna a rawn hring chhuak a, indopui te hial a thlen phah kan ti thei awm e. Hnam rilru leh hmangaihna pu/nei tura infuihna tangkai tak leh hmantlak tak pakhat chu Hla hi a ni. Hla in miringte rilru a hruai nasat theihzia leh hna a thawh nasat theih zia chu kan hre theuh awm e.

Hnam hla(national anthem) chungchang han sawi hmasa ila. Khawvel ram hrang hrangte hian hnam hla(national anthem) kan nei theuhva, hengte hi mahni hnam chawisanna leh hnam tan a duhthusam sawi chhuahna an ni a, hnam hmangaihna rilru tak tak atanga lo piang chhuak te an ni. Chuvangin hnam hmangaihna rilru kaitho tur leh mahni ram tana rinawm tura infuihna hmanrua a ni fo bawk. French ho hnam hla ‘La Merseillaise’ hi kum 1792-a Captain Rouget De Lisle a phuah a ni a, a phuah hun lai hi France ramin hun harsa an tawh lai(tualchhung buaina) a ni a, mipuite rilru nasa takin a kai tho a,

“ To arms, to arms, ye brave !
Th’ avenging sword unseath !
March on, march on, all hearts resolved,
To victory or death!”

Sipai hotu pakhat chuan “ he hla hian ka sipaite chu sipai dang sang khatin an belh tluk zetin a ti chak a ni” a ti tawp mai. Tin, British hnam hla ”God Save the King/Queen” te, China ho hnam hla, ”March of the Volunteers” te, German hnam hla ”Deutschland, Deutschland Uber Alles” tih te leh Russian hnam hla “Gimn Sovetskogo Soyuzer “ tih te chuan an ram mipuite chu hnam rilru putna kawngah thinlung hmunkhatah a luantir thei a ni.

India ram kan thlir pawhin British hovin min awp beh hnu ah hnam thanharhna hi a lo awm tan a. Kum zabi 19-na vel a Indian Nationalism in a tum ber chu British ho awp behna hnuai a tanga talchhuah a, mahni a din(independent) hi a ni ta reng a. Harsa takin British laka kan zalen theih nan beih chhoh a ni a. Nunna tam tak sengin kum 1947 ah zalenna kan lo nei ta. Kha mi hun chhung(freedom movement)a India mite tanrualna siamtu leh titha tho tu chu hla a ni. Bankim Chandra Chatterji-a novel ‘Anandmath’(kum 1882-a chhuah) ah chuan hla pakhat ‘Bande Mataram’(Hail to the mother) hi a tel a. He hla, ziakmi thenkhatten ‘the Bible of modern Bengalee patriotism’ an tih hial, hian India mite zingah nasa takin hna a thawk a, hnam rilru an lo put phahna chhan pawh a ni kan ti thei ang(a bikin Bengali ho zingah). He hla hi kum 1896-a Indian National Congress(INC) Session-ah khan sak a ni a, January 24, 1950 khan Indian National Song atan puan a ni ta nghe nghe a. He hla atang ringawt pawh hian hla in mihringte rilru a chawh thawh theih zia leh mihring rilru a kaihruai theih zia lang chiang hle a ni. Tuna India hnam hla, Rabindranath Tagore a phuah ‘ Jana gana mana’ te pawh hi India ram a hnam chi hrang hrangte inlungrual a, unau anga in en tura fuihna te leh India ram mawi tak chawina hla a ni a, hetiang hi hnam hmangaihna rilru atang chauh lo chuan phuah theih pawh a ni awm lo ve.

Mizoram bik han thlir leh ta ila. Mizo te hi mahni a ro inrel hran a khaw hrang hrang a awm thin kan nih avangin, ram leh hnam rilru kan pu har hle a. Kan hla hluite han en pawh hian hnam rilru pu tura infuihna lam hlate pawh, hun hmasa lamah chuan a vang viau a ni. Hnam rilru min puttir theitu tura hla rawn inlar hmasa ber nia lang chu Mizo pawh ni lo, Zosapthara’n kum 1903-a a phuah,

'Mizo kan ni lawm ilangin,
Kan hnam thatna zawng zelin,
Thil tha in kan ram timawiin,
Mizo lawm teh u'
tih hi a ni.

Amaherawhchu, a hnu deuhvah Mizo tlangvalte rilru atangin hetiang lam hawi hla hi a lo chhuak ve leh tan a. Thanga chuan 1908-1911 chhung khan hnam hla pahnih, “ Mizoram, Mizoram, ka thlahlel che” tih leh “Mizo fate u, finna zawng ula” tih te a rawn phuah ve leh a. Hemi hnu lamah hi chuan hnam hmangaihna lam hla hi a rawn chhuak ta pheuh pheuh a. Kum 1939-ah Kaphleia’n,
“Zoram! Ka ram!
Lu chhum ban chhum huama, kan pipute sah zau
.......Mahni a ding turin,.... chakna finna min zuk pe la
Pathian leh kan ram tan lo nise...”

tih hla a rawn phuah leh a, hei zet hi chuan Mizoram a ngaihhlut zia leh mahni ke a ding tura a duhzia thu te a rawn tarlang chhova. Mizo te rilru ah pawh a tla na hle nghe nghe a ni. Kum 1930-60 chho vel kha hnam hmangaihna /hnam hla lo pianchhuah vanglai a ni kan ti thei awm e. Anni bakah hian Rokunga, Vankhama, Liandala, Thanga, Laltanpuia etc. te pawhin hnam hla tha tak tak an phuah a. Kum 1947 khan Central YMA buatsaihin ‘hnam hla’ inphuahsiak huaihawt a ni a, hetah hian Rokuna hla “Ro min rel sak ang che’ tih chu atan thlan a ni a, tun thleng hian ‘ Mizo hnam hla’ a ngaih a la ni ta zel a. He hla hi ngun taka kan thlir chuan ‘ Mizo hnam hi Pathian hnena hlanna leh Pathian hnena ro relsak tura intlukluhna hla’ a ni awm e. Hei bakah hian Rokunga hla tho ‘Harh la, Harh la’ tih phei hi chu Mizoram buai lai(1966 bawr chho) vel kha chuan hnam hla pui a ni ringawt mai a, Mizo thalai tam tak rilru a chawk thova, thalai tam tak India sawrkar do turin ram hnuai lamah a tir chhuak a nih kha. Hun engemaw ti chhung chu sawrkar lam pawhin he hla hi sak an phal lo nghe nghe.

‘I ram leh hnam tan ding nghet la,
Thih thleng pawhin rinawm zel la,
Tho la, i ke in ding rawh’.
“Harh la, harh la, Zoram, i tlai ang e
..harh ru..aw hnam huaisen te u
hma lam pan zel ula,..thinlung tihuai rawh u..
kan hnam puanzar kan zar ve ang”

Laltanpuia hla, “Zoram hi kan ram a ni” tih te, “Independent kan Zoram tan” tih te chuan Mizo tlangvalte rilru a chhem alh a, kum 1966 a ram a lo buai pawh khan Mizo tlangval tam tak chu India sawrkar do turin an inpe chur chur mai a ni.
Tunhnai kum 10 chho velah hian nasa takin mizote hi ram leh hnam rilru putna kawngah kan harhchhuak nasa a. Hei hi kan rilru a lo changkan tak vang leh khaw hawi a lo zauh tak vangte, tlawmngai pawl leh zirlai pawlte hmalakna avangte leh politics kal fuhloh avangte a ni awm e. Hnam hmangaihna hla pawh tunhnaiah a lo piang chho ta zel a. Ho te a lang tangkai ve tak chu, tunlai a hnam hmangaihna hla chhuak thar hote hi a thu a that bakah a thluk a mawiin a satute hi tunlai zaithiam lar tak takte an nih avangin thalai ten kan ngai thla nasa a. Hnam veina rilru min puttir. Hei hi thil tangkai tak a ni awm e. C.Zoramliana hla

“ Kan vanglai hun leh ni zawngte
Kan ram tana hlan zelin;
Fam dairial pawh chang ila,
Kan sakruang Mizoram tan”
tihte, Daduhi hla,
“ Aw zofa i thanharh hun chuan
Kan ram, kan hnam min phel darhtu
Chi intih bingna hi sirah hnawlin
Hmatiang sawn zai relin, Kan leng tawh ang”

tihte hian Mizo fate hi chi leh chi, inthliar lova lungrual taka rilru hmun khat pu a leng ho dial dial turin min sawm a. Kan ram leh hnam chimrala a awm loh nan te, kan ram zim te hi phel darh a nih lohnan te a thahnem ngai taka thawk turin min sawm lawm lawm a ni.

Tunah chuan independent duhna rilru a bo tawh a, kan nationalism pawh a tum(goal) a lo danglam ta. ‘Ram leh hnam rilru i pu ang u’ kan tih chuan ‘ kan ram hi a zim tawh em a, chuvangin thendarh a nih a, hnam dangin min chimral lohna turin tan i la ang u’ kan tihna tluk a lo ni ta.

“ Chhinlung a chhuak zofa mi huaisen te,
Thian chhan thih ngam a, pipu sul sutute;
Tunah ngei hian an dungthul leh ang u,
Lung kan rual chuan kan hnam a him ngei ang”
tiin zofa zawng zawngte chu inpumkhat turin min sawm a, kan ram thendarh a nihlohna turin tan la thar turin min fuih sauh sauh a. Tun hnaiah Mizoram thendarh tuma beih a’n ni chho te hi Mizo hnam rilru pu tan chuan a na in, a lungchhiatthlak a,

“ Ka dawn thin kan Zoram hi
Engah nge hnam khat unau te
Doral an chan tak hi,
Hmelma duhthusam in maw,
Kan hnam leh kan ram a phel ang maw !
Kei zawng thinlai a na, ka phal thei lo”
ti a indawm kun ngawih ngawihna tham a ni.

Mizo history a chhim leh hmar indo chhan ni an sawi thin chu,
“ Bunghmun pai ang pawm tawh hnu,
Chengte ah lam ang let e, Lalpuithang lema”

tih mai a ni. He hla tlar hnih avang ngawt a indona a chhuak thei anih chuan, kan ram leh hnam hmangaihna hla neih zozai te hi chuan Mizote rilru ah nasa takin chi a tuh ang tih i beisei tlat ang u.

Tunah chuan ‘decade of nationalism’ ah Mizote kan chuang kai ta a. Hnam dang nupui/pasal a neih te chu a tum pawh tum chhin tawh lo ila, Zo hnahthlak zawng zawngte inpumkhat a, inzawmkawm(unification) tura beih a nih lai mek a, a inla hrang zawng a chetna te hi i bansan tawh ang u. Tichuan kan ram hi a lo par vul leh dawn nia.
“ Chu hun chu ka nghakhlel e,
Lungrualte a chhinlung chhuak,
Hmatiang kan sawn hun tur chu,
Zoram mai duhtawklovin,
Khuavel kan la chhing ngei ang”

Chhum zinna ram a lum

Tunlai chu chhum zinna ram an tih, Shillong khawpui pawh a lum khawp mai. Chhun lamah phei chuan ni a sa in a hrehawm thei hle. Amaherawhchu, Far khung ding thelh thuai mai hian daihlim a siam a, thing hlim hnuaia awm a nuam hle mai. India hmarchhaka University tha ber ni a chhal ngam, NEHU ah pawh zirlai ten khaw lum hi an tuar ve tho a, amaherawhchu Far hmun a awm ngang an ni a, a daihlim lam an pan thin. Thli a thaw reng bawk a, hei hian boruak lum lutuk tur a chhem kiang ve bawk.
Tunlai hian NEHU hnuaia zirlaite chuan Varsity Week an hmang mek a, chawhnu lamah Volleyball leh Basketball an khel thin. Karleh lamah hian Indoor leh Major games Final stage an khel dawn a ni awm e. NEHU Campus thlalak thenkhat te hi en ila, khawlum lutuk pawh tuar a ziaawm mahna le !!